12 декабря
  • EUR...............428.14
  • USD...............386.3
  • RUB...............6.08
Жамбыл облысында мүмкіндігі шектеулі балаларға арналған оңалту орталығы ашылды |  | BNews.kz 8 Января, 2019, 11:06 8217

Жамбыл облысында мүмкіндігі шектеулі балаларға арналған оңалту орталығы ашылды

Мұнда 25 жеткіншек арнайы медициналық сараптамадан өтіп, тегін ем қабылдап жатыр.



Жамбыл облысындағы Меркі ауданында мүмкіндігі шектеулі балаларға арналған оңалту және бейімдеу орталығы ашылды, - деп хабарлады 24.kz.

Бұл әлеуметтік нысанда қазір 25 жеткіншек арнайы медициналық сараптамадан өтіп, тегін ем қабылдап жатыр.

Айзада Балтамұратова – Меркі ауданының тұрғыны. 11 жылдан бері өздігінен жүріп тұра алмайтын баласы Құралдың денсаулығын нығайтумен жүр. Енді алысқа бармай-ақ, барлық қызмет түрін бір жерден алуға мүмкіндік туды.

"Балаларымыз осы жерде ем алады. Массажы бар, таңертең 8 жарымда алып келеміз, кешке 5-те алып кетеміз. Балаларымыз да осы жерге келгісі келіп тұрады", - дейді Меркі ауданының тұрғыны  Айзада Балтамұратова. 

Құны 52 миллион теңге болатын әлеуметтік нысанда 29 маман жұмыс істейді. Ғимарат іші ойын бөлмесі, баланың ой-санасын дамытатын ойыншықтармен толтырылса, дене шынықтыру бөлмесі арнайы құрылғылармен жабдықталған. Сондай-ақ мұнда ерекше балалардың сенсорлық қабілетін және ұсақ қол моторикасын дамытуға арналған құралдар да бар. 

"Біздің оңалту орталығы 25 балаға ашылған, жеке оңалту бағдарламасы бойынша балалар келеді", - деді мүгедек балаларды оңалту және бейімдеу орталығының директоры Клара Ракаева.

Ауданда екі жарым мыңнан аса мүмкіндігі шектеулі жан болса, олардың 357-сі – бір жарым жастан 18 жасқа дейінгі сал ауруы мен қимыл тірек қозғалысы дамымаған жеткіншек. Сондықтан алдағы уақытта орталықта емделушілердің санын көбейтіп, жылына 5 баланы сауықтыру жоспарланып отыр.

Читайте новости baigenews.kz в Telegram